تمام ماہی گیر خیریت سے ہیں جبکہ لانچ کو جیٹی پر منتقل کیا جا رہا ہے۔

کراچی کے قریب گہرے سمندر میں شکار کے لیے گئے ماہی گیروں کی کشتی کو حادثہ پیش آیا ہے، کشتی پر سوار تمام 8 ماہی گیر اپنی مدد آپ کے تحت الٹی ہوئی کشتی کے پیٹ پر سوار ہوکر ساحل تک پہنچ گئے۔ 

فشرمین کوآپریٹو سوسائٹی کراچی کے سیکیورٹی انچارج ناصر بونیری کے مطابق کراچی کے سات ماہی گیر المصطفیٰ نامی چھوٹی لانچ نمبر 17205 بی پر سوار ہوکر ناخدا راشد کے ہمراہ گزشتہ رات ماہی گیری کے لیے کراچی کے قریبی گہرے سمندر تک گئے تھے۔ 

طوفانی لہر کے جھٹکے میں ان کی لانچ الٹ گئی، تمام ماہی گیر ڈوب رہے تھے کہ اپنی مدد آپ کے تحت الٹی ہوئی اسی کشتی کے پیٹ پر سوار ہو گئے اور سخت جدوجہد کے بعد آج صبح سویرے کلفٹن کے قریبی ساحل تک پہنچ گئے۔

لانچ المصطفیٰ کے ناخدا راشد، شیراز، مرتضیٰ، کارو، سلمان، علی اکبر، محسن اور رفیق نے ساحل پر پہنچ کر اپنے عزیز و اقارب کو بتایا جنہوں نے ہنگامی امداد فراہم کی۔

ناصر بونیری کے مطابق تمام ماہی گیر خیریت سے ہیں جبکہ معجزہ کے طور پر بچ جانے والی ان کی لانچ کو جیٹی پر منتقل کیا جا رہا ہے۔



Leave a Reply

Your email address will not be published.