پی آئی اے انتظامیہ ایئر لائن کیلئے 18 ارب روپے کے فنڈز حاصل کرنے میں کامیاب ہو گئی ہے، پی آئی اے فلائٹ آپریشن کو بندش کا اب کوئی خطرہ نہیں۔

قومی ایئرلائن کے مالی حالات سے متعلق پی آئی اے ترجمان نے اعلامیہ جاری کر دیا ہے۔

پی آئی اے کے ترجمان عبداللّٰہ خان نے جیو نیوز کو بتایا کہ دو بینکوں سے پی آئی اے کو 18 ارب روپے کا قرضہ مل گیا ہے اور اس رقم سے تمام ضروری ادائیگیاں کر دی گئی ہے۔

ایک بیان میں ترجمان نے کہا ہے کہ پی آئی اے انتہائی ضروری ملکی اور بین الاقوامی ادائیگیاں کررہا ہے اور آج تمام ملازمین کو تنخواہوں کی ادائیگی بھی کر دی گئی ہے۔ پی آئی اے کا آپریشن تسلسل سے جاری ہے اور پروازیں آپریٹ ہو رہی ہیں۔

ترجمان پی آئی اے کا کہنا ہے کہ قومی ایئرلائن مضبوط بنیادوں پر قائم ہے اور مشکل حالات سے مقابلہ کرنے کی بھرپور صلاحیت رکھتی ہے۔ پی آئی اے کا دنیا بھر میں مضبوط نیٹ ورک موجود ہے اور پی آئی اے کے پاس بین الاقوامی اور اندرون ملک پروازوں کے لئے مناسب تعداد میں طیارے موجود ہیں جن کے ذریعے فضائی آپریشن جاری ہے۔