چوہدری پرویز الہٰی— فائل فوٹو

وزیرِ اعلیٰ پنجاب چوہدری پرویز الہٰی نے کہا ہے کہ علماء کی دعاؤں اور برکتوں سے سارے کام سیدھے ہو رہے ہیں۔

وزیرِ اعلیٰ پنجاب چوہدری پرویز الہٰی سے صدر وفاق المدارس العربیہ کی قیادت میں علماء کے وفد نے ملاقات کی ہے۔

علماء سے گفتگو میں انہوں نے کہا کہ ’یونیورسٹی آف قرآن اینڈ سیرت اسٹڈیز‘ کا متحدہ علماء بورڈ پنجاب ترمیمی بل اسمبلی اجلاس میں پیش کیا جا رہا ہے۔

وزیرِ اعلیٰ پنجاب نے کہا کہ میں نے وزارتِ اعلیٰ سنبھالنے کے بعد فوراً قرآن بورڈ کو بحال کیا۔

چوہدری پرویز الہٰی کا کہنا ہے کہ پنجاب میں ہر اسکول اور کالج کے طلبہ کے لیے ناظرہ اور ترجمۂ قرآن بڑھنا لازمی کر دیا گیا ہے۔

اُنہوں نے کہا کہ بچوں کا ذہن دین کی طرف راغب ہوگا تو ایک قوم بنے گی، ناظرہ اور ترجمۂ قرآن پڑھانے کے لیے علماء اور حفاظ کے لیے 1 لاکھ ملازمتیں پیدا ہوئی ہیں۔

وزیرِ اعلیٰ پنجاب نے کہا کہ اللّٰہ تعالیٰ نے نجی سطح پر سود کے خاتمے کے لیے پہلی قانون سازی کا اعزاز عطاء کیا ہے، ہم نے نجی سطح پر سود لینے پر 10 سال کی سزا مقرر کی ہے۔

اُنہوں نے یہ بھی کہا کہ عقیدۂ ختمِ نبوت کے لیے قانون سازی کی گئی، پہلی بار نکاح نامے میں عقیدۂ ختمِ نبوت کو شامل کیا گیا ہے۔

مولانا تقی عثمانی نے اس موقع پر کہا کہ دین کی خدمت کی برکات سے ہی آپ کی حکومت چلے گی۔

اُنہوں نے اپنی نیک تمناؤں کا اظہار کرتے ہوئے یہ بھی کہا کہ آپ دین کی خدمت کر رہے ہیں، علماء آپ کے لیے دعا گو ہیں۔



Leave a Reply

Your email address will not be published. Required fields are marked *